يا حزينة .. الحزن عُمْرِكْ
والحزانى غَلِّبُوكي
ياللي ساكنة في قلوبنا
وبلطجية يسكنوكي
عمرنا كله فداك
عمرهم ما ريحوكي
فَرْحِنا نقسم في قُوُتْنا
فَرْحِهُم لو يقسموكي
لابسة توب إسود حزين
والوش متغطي بطرحة
فرحتك لحظة بُكاك
لو في شدة أو في فرحة
إبكي جايز يرحموكي
ياحزينة ....
والزمن مليان حزانى
فينا من صانك .. حبيبك
وفينا من خان الأمانة
فينا من عاشقك قوية
وفينا من عاشقك مُهانة
..................
شفنا سجانك سَكَتْنا
قلنا دا حياتك في مُوتْنا
وإختيارنا كان حياتنا
يبقى كان لازم تِمُوتي
جيت أقولها بأعلى صوتي
يا يتيمة العمر كله
ربي لو يسأل ها قُولْ لُه
إننا فرطنا فيكي
وببساطة مشينا نسأل
يا حزينة فين أبوكي ؟
فين أخوكي ؟
ليه ولادك يحرقوكي !!!
ليه بغازك سمموكي !!!
إنتي بتموتي وحيدة
والقاتل فاكرك سعيدة
يابن بلدي في ميداني
بيع أمانك بيع أماني
واشتري لها عمر تاني
الحزينة واقفة تبكي
قاعدة بتعد الثواني
قاعدة تستنى في موتها
م اللي خاين والأناني
والحقيقة الْمُرَّة إنه .....
كله واحد .. كله جاني
يا حزينة .. كله جاني
يا حزينة .. كله جاني
-------
شعر : د. هاني أبوالفتوح
القاهرة - في السبت 26 نوفمبر 2011
يَاحَزِينَة .. كُلُهْ جَانِيْ !!!
2011-12-02
6470 قراءة
د- هاني ابوالفتوح
التعليقات والردود
0لا توجد تعليقات أو ردود على هذا المقال حتى الآن